Trond Hus

H. var ein gåverik ung gut og vart teken til omgangsskulelærar i 1825. Etter tradisjonen skal han ha lært rosemåling av Bjørn Bjaalid frå Telemark. H. var husmann, og byrja som rosemålar kring 1830. I 1856 flytte H. til Ålmerket i Kinsarvik, der han dreiv rosemålarverkstad. H. vart truleg den som gjorde opptakten til produksjonen av solekister (kister produsert for sal), som vart eksporterte til Bergen og Stavanger med fruktjektene frå Hardanger. I verkstaden sin dreiv han med kistesnekring dei første tre månadene, og resten av året dreiv han med måling. Solekistene har ein sjablongmessig telemarksprega dekor, men H. måla også forseggjorde kister etter tinging. Stilen til H. er ein detaljert og presis telemarksstil, kraftigare enn hjå dei han hadde lært av. Etter 1830 kan ein stort sett rekna Hardanger meir eller mindre for ein telemarksskule. Solekistene frå Kinsarvik er spreidde utover heile Vestlandet. Ofte kan ein finne eit serienummer måla på låsbeslaget. Hardanger folkemuseum har fleire kister etter H., men det finst ingen større offentlege arbeid etter han.