B. vart gift til Ølen i Sunnhordland i 1839 og slo seg ned på garden Dørheim. Etter tradisjonen kom han til Ølen på målarferd i 1837 saman med tre av brørne sine. I kyrkjeboka for Tuddal står det at B. flytte til Fjellberg prestegjeld som "tjenestedreng" i 1839. B. dreiv som målar og rokkedreiar ved sida av gardsbruket. Han var musikalsk, laga feler og spelte i brudlaup. Han var også ein dugande treskjerar. I målinga si høyrer han til Tuddal-Gransherad skulen, som syner påverknad både frå Glittenberg og Thomas Lurås.
I Telemark er det fleire interiør etter B., m.a. på Nordre Åsen i Tuddal. I Sunnhordlandsbygdene er det mest kister og skåp som er att av hans produksjon, og fleire av arbeida hans er signerte. I 1850 skar han ut altertavla i Ølen Kyrkje.
